لازم نبيع الحمار

القصة معروفة خاصة للمهتمين بالتنمية البشرية والقصص ذات المغزى والتي نجد في نهاية كل منها عبرة وعظة، وقد قالها قبل ذلك عمرو خالد في إحدى حلقات أحد برامجه .
تنبيه: أحداث القصة القادمة مبنية على أحداث حقيقة وكذلك الأشخاص بها
ليلة في إحدى مدن الأندلس - ثلاثة حمّارين حول نار يتسامرون 
أحدهم يسأل الآخريين: ماذا لو أصبحت الخليفة؟ تطلبوا مني ايه؟؟؟
الأولاني: لا والله؟ وده من ايه ده؟؟؟
التاني: خليفة مرة واحدة؟؟؟ طب قول كبير الحمّارين مثلا ... لكن خليفة مرة واحدة
هو - بزهق- : يا جدعان بقول فرضًا فرضًا، تطلبوا مني ايه؟
الأولاني: لو بقيت الخليفة يا عم محمد عايز أبقى كبير الحمارين، وتديني قصر وتظبطني كده
التاني: أنتم الاتنين شكلكم هيستم، بقولك ايه، لما تبقى الخليفة كده - وابقى تف على قبري - ابقى ركبني الحمار بالعكس وابقى وريني هتعمل ايه...
الخلاصة الراجل تاني يوم باع حماره ، وراح اشتغل في الشرطة لحد ما بقى صاحب الشرطة -وزير الداخلية- وبعدين الخليفة مات.
صاحبنا كان متودد جامد لزوجة الخليفة بالهدايا ورعاية ابنها ولي العهد اللي عمره 11سنة. فأدته مناصب وقربته من الحكم وقصر الحكم.
أهل الخليفة الصغير خافوا من صغر سنه، ومن أنهم يعينوا وصي عليه من بني أمية -من نفس العيلة- أحسن ياخد الخلافة لنفسه، قالوا خلاص يبقى نخلي مجلس الوصاية حد من بره بني أمية.
فعلا عينوا صاحبنا ده -محمد بن أبي عامر ومعاه اتنين تانين 
الحمّار فضل يدي أسافين في واحد من الاتنين واتجوز بنت التاني وبقى هو الكل في الكل
كان عدى على الليلة اللي كان فيها مع أصحابه 30 سنة
في يوم بعت الحرس قالهم في المكان الفلاني هتلاقوا اتنين شكلهم كذا وكذا هاتومهم وتعالوا.
جم طبعًا شافوا الهيلمان اللي هو فيه ركبهم قعدت تخبط على قصر الجيران .... 
قال للأولاني: أنت طبعا فاكر الليلة اياها صح؟ كنت طالب ايه بقى؟ 
الأولاني: يا مولانا أنت عارف
قاله: قول أنا عايز اسمع الناس اللي هنا ، قول ماتتكسفش
الأولاني: كبير حمارين وقصر وجواري بقى وظبطني
قاله: هتتظبط يا معلم
التاني بقى: وأنت يا بتاع تف على قبري ؟؟؟
التاني وهو خلاص هيموت: السماح يا ريس 
هو: لا والله قول قول دا انت هتتنفخ
التاني: الأمر لله - نفخة بنفخة بقى
وفعلا اتنفخ زي ما طلب بالظبط


طبعا الاستفادة الرئيسية من القصة ، أن صاحبنا أول حاجة عملها أنه باع الحمار عشان يقدر يحقق حلمه
كل واحد فينا في حياته حمار - أو عدة حميييييير بمعنى أدق - لازم يبيعه عشان يعرف ينطلق


بصراحة أنا استفدت حاجات تانية: 

1. الستات ملهمش أمان... يعني أم ولي العهد ضيعت ملك ابنها عشان هي مقتنعة بصاحبنا ده.
2. اللي تخاف منه ميجيش أحسن منه، عشان خايفيين من واحد من بني أمية ياخد الحكم من ولي العهد، أهو جالهم واحد مش من بني أمية وأخد الحكم ونفخ ولي العهد ومخلهوش يخرج أصلا من القصر بتاعه إلا بإذنه
3. متستقلش بحد، يمكن بكره يبقى خليفة ولا وزير داخلية وينفخك 
4. مفيش مشكلة أنك تحلم ، يمكن حلم يحققه ليك حد غيرك حتى ، يعني الحمار الأولاني حلم بقصر وفلوس، وصاحبه هو اللي حققه ليه، كل اللي عمله أنه شارك في الحلم بس مش أكتر، حتى الاستثمار في الأحلام مفيد، احلم على أقصى ما تستطيع مش هتخسر حاجة في النهاية